‘Nu munno ‘e ciucci

‘O munno ?
‘O munno, signori miei, è fatto da tanta ciucci

si, si avite capito bbuono
tanta ciucci,

Ciucci, e ciucce
ovviamente
e sennò a parità a ‘ndò va a fernì ?

Ciucci io,
ciuccio tu,
ciucci tutte quante.

Istruiti o analfabeti,
cu ‘e sorde o muorte e ‘famme,
simme sulo tanta ciucci.

Si, sentite a me,
simme tanta ciucci,
tanta ciucci ‘nzriusi e cu ‘e parauocchie,

e ogni uno e chisti ciucci
vede sulo chello ca vo vedè,

e ogni uno e chisti ciucci,
penza sulamente a ‘e cazze suoje

Mimmo

Lenzole janche

Tu si a festa dinto o’ paese quand io ero criaturo,
si è lenzole janche spase ‘o sole,
tu si a paura ca me metto dinto ‘o scuro

Tu si l’allucca de guagliune abbasco ‘o vico,
si chella stradulella stretta,
tu si o ritornello e chillo mutivo antico

Tu si o scuorno ca me mette mmiezzo all’ato,
si l’addore do pane cavuro,
tu si o chiant ‘e na criatura appena nata

Tu si a frenesia ca m’afferra,
si a cuperta ‘e lana
tu si ‘o paraviso sciso n’terra.

Mimmo

Tu si ‘na vera prelibatezza

Tu si ‘na vera prelibatezza,
si doce cchiù de na pastiera,
cchiù de na sfogliatella.

Tu si ‘na vera squisitezza,
si saputira cchiù de ‘na parmiggiana,
cchiuù de gnocchi co’ ragù.

E io te vulesse assaggià
a nu murzillo a vote.
Te vulesse surseggià
comme ‘na tazzulella ‘e cafè.

Mimmo

‘O muscillo ‘nnammurato

St ’uocchie tuje muscì, mo ca meglio è guardo
me parono doje biglie ‘e vetro,
ma che ddico, me parono dojè palle e bigliardo.

Vieni ‘cca, nun te mettere paura,
nun fujì arreto ‘o canciello
nun te faccio niente, ne può sta sicuro.

Muscì sto ‘nnanzo a sto ciardino a cchiù e tre ore
dijiuno e muorte e famme
e ttuo chesto, pe vedè ‘a padrona toja.

Ah, viato a te muscì, viato a te !
comme vurria sta a ‘llu posto tuoje,
comme vulesse avè pure io chelle carezze soje.

Ma veco che suspiri, te veco strano, assente, stralunato
forse aggio capito, d’a padrona toija, de chella vocca bella,
de chille uocchie ‘e notte, pure tu si ‘nnammurat ?

E comme simme belle tutte e duje muscì, io e te
‘mmijezzo a chesta via ojì, parimme duje pazz !
io guardo a te, e tu guardi a me.

E intanto n’at’ora se ne gghiuta e ancora nu se vede
chissà addò starrà, chissà che starrà facenno
ma ‘nzomma è majè possibile che va sempe fujenne.

Si pe caso tu a vedisse, fanciancella sta ‘mmasciata
dinciancello a chillo ciore, a chillo ciore frisco e bello
che sto ‘cca che me ‘ne more e d’addurarlo sto’ sperenno.

Mimmo

Comme ‘nu Rre

Oggi nun voglio fa niente,
voglio sulo cammenà,
cu ‘e mmane dinto a sacca
e cu ‘a faccia stesa ‘o sole.

Oggi voglio fa filone a cchesta vita,
voglio correre,
ma che ddico correre,
oggi voglio vulà.

Oggi voglio essere libbero,
voglio fa ‘a via cchiù longa,
senza me peroccupà ‘e arrivà tarde,
oggi voglio fa cu ‘a capa mia.

Oggi sta vita ma voglio magnà mmiezz ‘o ppane,
a muorze,
senza crianze
e senza manco lavarme e mmane.

Oggi voglio fa ‘o scostumato, cu o pietto a fore,
voglio piscià ‘nfaccia ‘e mmura,
voglio sfottere ‘a ggente che passa
perfino ‘o tiempo voglio cuffià.

Oggi ‘nzomma,
me voglio sentere cchiù e nu re,
ma alla fine ‘e sta jiurnata,
voglio murì pe te.

Mimmo