Quanno sto vicino a te

Quanno sto vicino a tte io fremmo e frennesia,
e me saglie o sangue ‘ncapa,
smanio, suspiro, me sciocsio, sto tutto accalurato

me sento comme l’uva dinto ‘o tino
che nun è ancora vino,
comme a sarza ‘ncoppo ‘o fuoco
a dummeneca e matina

Quanno sto vicino a tte me vene ‘artéteca,
e mo m’acconcio a giacca, e mo me saglio o culletto,
me giro, m’avoto, me pare n’anguilla

me sento comme ‘e lastre de fenestre
quanno vene o terremoto
comme e quanno pe nu goal,
tutto o stadio s’arrevota

Mimmo

Tu si ‘na vera prelibatezza

Tu si ‘na vera prelibatezza,
si doce cchiù ‘e ‘na pastiera,
cchiù ‘e ‘na sfogliatella.

Tu si ‘na vera squisitezza,
si saputira cchiù ‘e ‘na parmiggiana,
cchiuù d’e gnocchi co’ ragù.

E io te vulesse assaggià
a nu murzillo a vote.
Te vulesse surseggià
comme ‘na tazzulella ‘e cafè.

Mimmo

‘O muscillo ‘nnammurato

St ’uocchie tuje muscì, mo ca meglio ‘e guardo
me parono doje biglie ‘e vetro,
ma che ddico, me parono dojè palle ‘e bigliardo.

Vieni ‘cca, nun te mettere paura,
nun fujì arreto ‘o canciello
nun te faccio niente, ne può sta sicuro.

Muscì sto ‘nnanzo a sto ciardino a cchiù ‘e tre ore
dijiuno e muorte ‘e famme
e ttuo chesto, pe’ vedè ‘a padrona toja.

Ah, viato a te muscì, viato a te !
comme vurria sta a ‘llu posto tuoje,
comme vulesse avè pure io chelle carezze soje.

Ma veco che suspiri, te veco strano, assente, stralunato
forse aggio capito, d’a padrona toija, ‘e chella vocca bella,
‘e chille uocchie ‘e notte, pure tu si ‘nnammurat ?

E comme simme belle tutte e duje muscì, io e te
‘mmijezzo a chesta via ojì, parimme duje pazz !
io guardo a te, e tu guardi a me.

E intanto n’at’ora se ne gghiuta e ancora nu se vede
chissà addò starrà, chissà che starrà facenno
ma ‘nzomma è majè possibile che va sempe fujenne.

Si pe’ caso tu a vedisse, fanciancella sta ‘mmasciata
dinciancello a chillo ciore, a chillo ciore frisco e bello
che sto ‘cca che me ‘ne more e d’addurarlo sto’ sperenno.

Mimmo

Quanno ‘o core se ‘ncapunisce

Quanno ‘o core se ‘ncapunisce
nun ce stanno ne santi ne maronne,
perdi o tiempo e a fantasia, nun o faje capace.

Quanno ‘o core se ‘ncapunisce
se ne va pe cazz suoje,
è inutile ca o chiame, nun te sta a sentì.

Quanno ‘o core se ‘ncapunisce
è comme nu ciuccio, nu mulo, ca se ‘nchiomma ‘nterra,
è inutile che tiri, nun ò spuost da ‘lla.

Quanno o core se ‘ncapunisce
‘mpietto te combina nu maciello
proprio comme ‘o core mio, sta facendo mo pe te.

Mimmo

[A Federica, dolce e cara amica.
Affinché il suo cuore possa
quanto prima ritrovare la via della felicità.]

Tiempo

Passa ‘o tiempo, passa
e passa senza pietà pe cose meje,
passa e me leva a terra a sotto e piede

Passa ‘o tiempo, passa
e passa senza scuorno, senza crianza,
passa e me roseca sta vita a poco a poco

Passa chillo ‘nfame
e me sbatte contro e mmura,
me guarda,
e po me ride ‘nfaccia

E io pure ‘o guardo,
o guardo ‘nfaccia e le dico:
ride,
ride, ride pure strunzo ca nun si ato
nun o saje
che io te aggio fottuto ?

cu st’ ammore dinto ‘o core
nun me faje cchiù paura !

Mimmo