Monologo Pulcinellata

Personaggio: Pulcinella.

Comme so’ arrocante e pruputente li patrune, li ricche sfunnate cu’ li sacche chiene de sorde e li panze abbruffate.

E comme so’ favuze ! Sempe cu’ ‘e stesse facce ‘e bronzo a dicere che le spettano ‘e diritto li privileggi e li ricchezze e che la cosa nun è scuveniente che è naturale e giusto che a lu munno ‘nce sta chi tene tutto e chi nun tene niente.

Fino a ieri dicevano ch’erano nobbele, che tenevano lu sangue de ‘n’ato culore e che pe’ chesto putevano fa li puorce commote lloro, cu’ la chiesa sempe cumpiacente, a fa passà tutto pe’ volontà dell’onnippotente. A chesto li prievete e li cardinale so’ servute, a dicere che lu padreterno accusì aveva voluto.

E invece è stato sultanto suttumettenne altri uommene, cu la forza e a la preputenza de la dittatura, che li snubbeliate se so’ putute annubbeliare e ‘ncurunarse re e ‘mperature.

Ogge li conte e li marchese nun ce stanno cchiù, lu sangue d”o s’è blu sculurato e li corone stanne dinte a li musei ‘stipate. Ma lu stesso niente è cagnate: ‘nce stanne sempre li poche che se magnano tutto pane e li tante che nun arrivano a dimane !

Li patrune d’ogge ‘nce fanno credere che li miliarde se li so’ fatte cu’ lo sudore della fronte e l’intelligenza della cerevella, ma so’ tutte panzane v”o dice Pullicenella ! Sfruttanne ‘o prossimo … si ! Cu li guerre ‘mpetruliate, li marulizie autorizzate e li ‘mbruoglie ‘munnezzate. Sugannese ‘o sangue d”a gente… si! E si lo popolo straccione nun è chiù tanto pezzente li padrune se ne vanno dinto a ‘n’altro cuntinete. E’ chesta a chiù grossa delle invenzioni e sapite comme ‘a chiammano ? globalizzazione.

So’ brave assaje li patrune, e li cane fidate che tenene a tuorno, a vennerve ‘o vino cu’ li frasche e la notte pe’ lu juorno. E talmente fatto buono lo ‘mpapocchiamiento che ve cunvincene che è giusto e che loro nun centrano niente.

Quanno po’ la famma mozzeca lu stommaco che li parole nun bastane chiù a tenerlo buono, pe’ lo straccione che aizza ‘a voce ‘nce sta sempre ‘a cura è nu bello maziatone. E nu rimedio che ha sempe funzionato, pe’ chesto so’ state create li capitane e li surdate.

Stanno buono attiente li fetiente a te scuraggià si cirche d’ arapì l’uocchie a la gente, subbeto te dicene che ‘e cose accussì vanno e che ‘e parole se porta via lu viento. E che anzi lu servo a da essere ricunuscento a lu patrdone suoio, nun è certo nu caso, è grazie a isso che porta ‘a pagnotta a casa.

Guaie a te se poi sti fatte ‘e pruove a mettere in prosa, ‘o cuorpo Pullicenella ne sape qualche cosa. Pe’ chesto è pe precauzione che se’ mascherato, ma bastunate e lignate ‘o stesso l’ha pigliate.

Pullicenella quante volte t’aggio ditto che di certi argomenti non devi parlare. La gente vuole ritere. La gente deve ritere, sulo accussì se po’ scurdà de li probleme che tene. A chesto servono li teatrante, li buffune comme te. Pulcinella, come castico per quello che hai detto sarai incarcerato pe’ tutta la vita.

No signore eccellenza non volevo dire quelle cose, dovete sapere tengo la lengua cusuta alla rovescia e quindi le parole mi escono alla smerza. Per questo ho detto che siete una chiaveca, signore eccellenza.

Pullicenella, perché vuoi ricordare alla povera gente le miserie lloro. La giustizia non è di questo mondo. E poi ricorda Pulcinella che gli ultimi su questa terra saranno i primi ad entrare in paradiso. Siamo nati su questa terra solo per soffrire.

Eminenza Voi però soffrite molto beno !

Pullicenella proprio tu che si nu’ ciuccio de primma scelta, che nun saie né leggere né scrivere vulisse fa’ capì a la gente comme funziona lu munno ? Basta! Per punizione sarai prima frustato a sanguo e poi cacciato da lu paese.

Li padrune vonne che Pulcinella a da essero ‘o cchiù analfabeta e ignorante, accussì che pure ‘o l’urdeme fesso che lo vede se po’ senti superiore e importante. Dicette bbuono ‘o zi Pascale: chi te fa chiagnere te vo’ bene, chi te fa ridere te vo’ male.

Allora redite, redite. A pullicenella l’avite accise, frustato e bastunato, torturato e ‘ncarcerato, ma sta ancora ca ! pecché a lu cuorpo lo putite accidere o farlo male assaie, ma lu spirito suoie, chillo nun more maie!

FINE